好耐冇睇個戲lu...早排調左更放工可以早一點...有時會行下影碟鋪, 返工實在太累了, 已經冇時間同精神去上網搵戲睇, 索性買幾隻返屋企算, 反正都係$20隻(VCD價, 當然唔係老翻啦!)

正好中秋節有兩日假, 一次過煲晒佢, 感覺都唔錯, 哈~($80睇4場戲抵過去戲院)

今次睇既戲有新有舊, 不過全都是西片, 近期既係早排成日經過地鐵站時都見到既《天魔特攻》, 舊片就有《猿人爭霸戰》、《無頭谷》同16年前既疆屍片《驚情400年》。

《驚情400年》記得細個係電視(三色英文台)睇過, 覺得同一般既疆屍好唔同, 講情既部份頗重, 好想再睇多次, 後來先發覺, 原來劇中好多演員都係而家好出名既, 好似做主角德古拉既GARY OLDMAN, 原來就係之前做BATMAN BEGINS同BATMAN THE DARK KNIGHT既警長, 又有戲中既小白臉, 竟然係之後做SPEED, MATRIX等等紅極一時既奇洛李維斯, 仲有老戲骨, 英國既安東尼鶴堅斯, 呢個我識因為睇過《沉默的羔羊》, 但係就唔知原來佢演既竟然係VAN HELSING(另一套我好鍾意既同名電影《狙魔人》)....睇完感覺依然不賴, 好正!

第2套係以特技化妝取勝既《THE PLANET OF APES》, 整體黎講算係不過不失, 當中有D情節我就不敢拘同, 例如劇中人係大空飛行時既裝備略嫌簡單, 主角遇到意外落到不知名既星球時竟然可以肆無忌憚的將太空保護衣, 頭盔等除下, 直接呼吸空氣和潛水等都有違一般常識。然而當中既情節還算OK, 到最後結局有如衛斯理小說咁, 主角以為可以返到原先自己既世界, 點知發現原來又係另一個開始, 沒完沒了似的...

跟住既《無頭谷》, 小時係報紙上見到廣告, 已經對此無比的好奇, 現在終於一償所願。主角係《EDWARD SCISSORHANDS》、《魔盜王》以及《魔街理髮師》的主角JOHNNY DEPP, 再一次睇真佢既演出, 的確好有魅力, 開始越來越鍾意佢既戲(除左TOM HANKS佢係第2個囉)。

最後一齣係近期少少既《HELLBOY》, 不難發現, 原來我一直都係鍾意睇呢D古靈精怪既特技片,睇完之後覺得套戲其實有好多地方交待得唔夠清楚或者力度不足, 唯有靠大家既想像力啦, 不過整體故事結構還可接受。同《猿》片一樣, 睇呢兩套戲毋須太認真啦, RELAX一下就可以了。